22/10/2020

Bharat News Agency

The News Agency of India

કયા બ્લડગ્રુપના લોકોને કોરોના સંક્રમણનું જોખમ ઓછું? તાજેતરમાં થયેલા સ્ટડીમાં ખુલાસો

1 min read

બ્લડ ગ્રુપ પ્રમાણે વ્યક્તિને કોરોના વાયરસથી સંક્રમિત થવાનું જોખમ અને તેની ગંભીરતા કેટલી હશે તે જાણવા માટે હાથ ધરાયેલા બે તાજા સ્ટડીનું પરિણામ આવ્યું છે.

 છેલ્લા 10 મહિનામાં આપણે એટલું તો જાણી જ ગયા છીએ કે, કોવિડ-19 માટે SARS-COV-2 વાયરસ જવાબદાર છે. આ વાયરસની જુદા-જુદા લોકો પર અસર પણ જુદી થાય છે. કેટલાક લોકોમાં સામાન્ય અને મધ્યમ લક્ષણ જોવા મળે છે તો કેટલાક પર કોરોનાની ગંભીર અસર થાય છે. જો કોઈ દર્દીને પહેલાથી જ કોઈ બીમારી હોય તો કોરોના ઘાતક પણ સાબિત થઈ શકે છે. કોરોના પર થયેલા વિવિધ સ્ટડીમાં સાબિત થયું છે કે, ઉંમર, જાતિ (સ્ત્રી કે પુરુષ) અને અન્ય બીમારીઓ પ્રમાણે તેની અસર પણ ભિન્ન છે. હવે સ્ટડીમાં એવું પણ સામે આવ્યું છે કે, કોરોના ઓછો કે વધુ અસર કરવા પાછળ બ્લડગ્રુપ પણ મહત્વનું પરિબળ છે. હકીકતે હાલમાં જ થયેલા બે સ્ટડીમાં સામે આવ્યું છે કે, અમુક બ્લડ ગ્રુપવાળા લોકોમાં આ વાયરસ ઓછો સમય રહે છે અને ઓછી અસર કરે છે જ્યારે અન્યો પર વધુ અસર દેખાડે છે.

આ અઠવાડિયે બે સ્ટડી પબ્લિશ થયા છે, જે મુજબ O બ્લડ ગ્રુપ ધરાવતા લોકોને કોરોના સંક્રમણ થવાનો ખતરો ઓછો રહે છે. જો તેઓ સંક્રમિત થાય તો પણ તેઓ ગંભીરરૂપે બીમાર થતાં નથી. નવા સ્ટડીમાં સામે આવ્યું છે કે, O અને B બ્લડગ્રુપ ધરાવતા દર્દીઓએ બ્લડ ગ્રુપ A અને ABની સરખામણીએ ઈન્ટેન્સિવ કેર યુનિટ (ICU)માં ઓછો સમય વિતાવ્યો. O અને B બ્લડગ્રુપના લોકોને વેન્ટિલેટરની પણ ખાસ જરૂર પડી નહોતી અને તેમની કિડની ફેઈલ થવાના ચાન્સ પણ ખૂબ ઓછા હતા.

મહત્વનું છે કે, અગાઉ થયેલા રિસર્ચમાં પણ આ વાત સામે આવી હતી કે બ્લડ ગ્રુપ O ધરાવતા લોકોને કોરોના સંક્રમણનો ખતરો ઓછો છે. ત્યારે આ નવું સ્ટડી ચિત્ર વધુ સ્પષ્ટ કરી રહ્યું છે. બ્લડ એડવાન્સિસ નામના જર્નલમાં આ બંને નવા સ્ટડી બુધવારે પ્રકાશિત થયા હતા. પહેલા સ્ટડીમાં કેનેડાના વેનકુવરમાં ફેબ્રુઆરીથી એપ્રિલ દરમિયાન ગંભીર રીતે બીમાર કોરોનાના 95 દર્દીઓનો સમાવેશ થયો હતો. સંશોધકોને જાણવા મળ્યું કે, આ દર્દીઓમાંથી O અથવા B બ્લડગ્રુપના દર્દીઓએ A કે AB બ્લડ ટાઈપના દર્દીઓ કરતાં સરેરાશ 4.5 દિવસ ICUમાં ઓછા વિતાવ્યા. જ્યારે A કે AB બ્લડગ્રુપના દર્દીઓએ ICUમાં સરેરાશ 13.5 દિવસ વિતાવ્યા હતા. જો કે, રિસર્ચરોએ બ્લડ ટાઈપ અને દરેક દર્દીના હોસ્પિટલમાં વિતાવેલા કુલ સમયને ગણતરીમાં લીધો નહોતો.

સંશોધકોને જાણવા મળ્યું કે, O/B બ્લડગ્રુપ ધરાવતા 61 ટકા દર્દીઓને વેન્ટિલેટરની જરૂર પડી હતી. જ્યારે તેમની સરખામણીમાં A/AB બ્લડગ્રુપના 84 ટકા દર્દીઓને વેન્ટિલેટરની જરૂર પડી હતી. તો આ તરફ A અને AB બ્લડગ્રુપના દર્દીઓને ડાયાલિસસની વધુ જરૂર પડી હતી. સ્ટડીના તારણમાં સંશોધકોએ કહ્યું, “A કે AB બ્લડગ્રુપના દર્દીઓમાં કોરોનાના કારણે ઓર્ગન ફેઈલ થવાનો ખતરો O કે B બ્લડ ટાઈપના દર્દીઓ કરતાં વધારે છે.”

બીજા સ્ટડી પ્રમાણે, O બ્લડગ્રુપ ધરાવતા લોકોમાં અન્યોની સરખામણીએ કોરોના વાયરસથી સંક્રમિત થવાનું જોખમ નીચું છે. સંશોધકોની ટીમે નેધરલેન્ડ્સમાં લગભગ પાંચ લાખ લોકોનો કોરોના ટેસ્ટ કર્યો હતો. ફેબ્રુઆરીના અંતથી જુલાઈના અંત વચ્ચે આ ટેસ્ટ કરવામાં આવ્યો હતો. જેમાંથી આશરે 4600 લોકોનો કોરોના રિપોર્ટ પોઝિટિવ આવ્યો હતો. તેમાંથી 38.4 ટકા લોકોનું બ્લડગ્રુપ O હતું. માટે રિસર્ચરોએ તારણ કાઢ્યું કે, O બ્લડગ્રુપ ધરાવતા લોકોમાં ઈન્ફેક્શનનું જોખમ ઓછું છે.

સરળ ભાષામાં કહીએ તો, લાલ રક્તકણોની સપાટી પર રહેલા પ્રોટીન જેને A કે B એન્ટીજન કહેવાય છે, તેની હાજરી કે ગેરહાજરીના આધારે બ્લડ ટાઈપ નક્કી થાય છે. જેમનું બ્લડ ગ્રુપ O હોય તેમનામાં આ એન્ટીજન હોતા નથી. O સૌથી સામાન્ય બ્લડ ટાઈપ છે. લગભગ 48 ટકા અમેરિકનનોનું બ્લડગ્રુપ O છે, તેવો ઉલ્લેખ Oklahoma બ્લડ ઈન્સ્ટીટ્યૂટના રિપોર્ટમાં છે.

બ્લડ ટાઈપ અને કોરોના વાયરસના જોખમ વચ્ચેના નવા સ્ટડીના પરિણામો જૂના સંશોધનોથી લગભગ મળતા આવે છે. અગાઉ જુલાઈમાં પબ્લિશ થયેલા સ્ટડીમાં પણ ઉલ્લેખ હતો કે, અન્ય બ્લડ ગ્રુપની સરખામણીએ O બ્લડ ટાઈપના લોકોમાં કોરોનાથી સંક્રમિત થવાનું જોખમ ઓછું છે. માર્ચ મહિનામાં ચીનના વુહાન અને Shenzhen શહેરોમાં 2100 કોરોનાના દર્દીઓ પર સ્ટડી હાથ ધરાયો હતો. જેમાં O બ્લડગ્રુપના લોકોને ઓછું જોખમ હોવાનું બહાર આવ્યું હતું.

ભૂતકાળમાં થયેલા સંશોધનમાં પણ સાબિત થયું હતું કે, O બ્લડગ્રુપના લોકોમાં SARSથી સંક્રમિત થવાનું જોખમ નીચું હતું. ઉલ્લેખનીય છે કે, નવા કોરોના વાયરસનો 80 ટકા જેનેટિક કોડ SARS સાથે મળતો આવે છે. 2005માં હોંગકોંગમાં થયેલા સ્ટડીમાં સામે આવ્યું હતું કે, SARSથી સંક્રમિત થયેલા લોકોમાં મોટાભાગના એવા હતા જેમનું બ્લડ ગ્રુપ O નહોતું.

જો કે, વેનકુવરમાં થયેલા સ્ટડીના સહ-લેખક Mypinder Sekhonને કહ્યું, “હજી પણ ઉંમર અને કો-મોર્બિડિટી (અન્ય બીમારીઓ) જેવા પરિબળો મહત્વના રિસ્ક ફેક્ટર ગણી શકાય. માટે બ્લડ ગ્રુપ Aના લોકોએ નાસીપાસ થવાની કે ભયભીત થઈ જવાની જરૂર નથી અને O બ્લડ ગ્રુપ ધરાવતા લોકોએ ‘કંઈ નહીં થાય’ તેવો ભ્રમ પાળવાની જરૂર નથી.”

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.