22/10/2020

Bharat News Agency

The News Agency of India

‘સાથ નિભાના સાથિયા 2’માં ‘અનંત’ના રોલ માટે પત્ની પાસેથી ગુજરાતી શીખ્યો હર્ષ નાગર

1 min read

સીરિયલ સાથ નિભાના સાથિયા 2 19 ઓક્ટોબરથી શરૂ થઈ રહી છે. એક્ટર હર્ષ નાગર સીરિયલમાં લીડ રોલ કરી રહ્યો છે.

સીરિયલ ‘સાથ નિભાના સાથિયા 2’ સાથે એક્ટર હર્ષ નાગર પોતાના કરિયરની નવી શરૂઆત કરવા જઈ રહ્યો છે. આ સીરિયલમાં હર્ષ લીડ રોલમાં જોવા મળશે. દિલ્હીનો હર્ષ ઝડપથી શીખવાની કળા, નિર્દોષ દેખાવ અને વિવિધતાસભર રોલ ભજવવા માટે જાણીતો છે. હર્ષ પાંચ વર્ષનો હતો ત્યારથી પર્ફોર્મ કરી રહ્યો છે અને આજ સુધી તેણે ક્યારેય પાછું વળીને નથી જોયું. અંગત જીવનની વાત કરીએ તો હર્ષે વડોદરાની ગ્રાફિક ડિઝાઈનર તન્વી વ્યાસ સાથે લગ્ન કર્યા છે. તન્વી પૂર્વ મિસ ઈન્ડિયા અર્થ 2008 રહી ચૂકી છે.

‘અનંત’ બનવા હર્ષે કરી ખૂબ મહેનત

દર્શકો હર્ષને 19 ઓક્ટોબરથી ‘સાથ નિભાના સાથિયા 2’માં અનંત દેસાઈના રોલમાં જોઈ શકશે. આ સીરિયલ ફેમિલી ડ્રામા છે અને આની પહેલી સીઝન ખૂબ સફળ રહી હતી. આ વખતે ફેમિલી ડ્રામાની સાથે અનંત અને ગેહના (સ્નેહા જૈન) વચ્ચેની લવસ્ટોરી જોવા મળશે. આ રોલ માટે હર્ષ બોલ-ચાલની લઢણ, એક્સપ્રેશન પર ખૂબ મહેનત કરી રહ્યો છે. આ રોલ માટે હર્ષ પત્ની તન્વી પાસેથી ગુજરાતી પણ શીખ્યો છે.

પત્ની તન્વી પાસેથી શીખ્યો ગુજરાતી

ગુજરાતી બોલી પર પકડ મેળવવા માટે હર્ષે કેટલી મહેનત કરી તે વિશે વાત કરતા કહ્યું, “મારી પત્ની તન્વી પાસેથી મેં હંમેશા ગુજરાતી ભોજન અને સંસ્કૃતિ વિશે ઘણું જાણ્યું છે. ગુજરાતી ખૂબ જ મીઠી ભાષા છે અને મેં આ ભાષાને વધુ નજીકથી જાણવાનું પસંદ કર્યું. સાથ નિભાના સાથિયામાં અનંતના પાત્રને વધુ નિખારવા માટે હું ગુજરાતીના બોલવાની વિવિધ છટા અને રીતભાત શીખ્યો. આ પ્રક્રિયામાં મારી પત્ની તન્વીએ ખૂબ મદદ કરી. ગુજરાતી બોલી સ્પષ્ટ રીતે બોલતા શીખવા ઉપરાંત ઉચ્ચારણો અને કેટલાક જાણીતા શબ્દપ્રયોગ પણ ચીવટપૂર્વક શીખ્યો. અત્યાર સુધી આ ટ્રેનિંગ પડકારજનક અને ઉત્સાહવર્ધક રહી છે. આ શો મારા હૃદયની ખૂબ નજીક છે. મેં મારી તમામ શક્તિ આ શો પાછળ ખર્ચી છે અને મને આશા છે કે તે સ્ક્રીન પર સારી રીતે દેખાશે. નવી ભાષા શીખવી હંમેશા મજેદાર હોય છે. આ એક અલગ જ અનુભવ રહ્યો.”

જૂના પાત્રો પણ નવી સીઝનમાં દેખાશે

હર્ષની આ તૈયારી પરથી લાગી રહ્યું છે કે, અનંતને પડદા પર જીવંત કરવા માટે તેણે ખૂબ મહેનત કરી છે. રશ્મિ શર્માએ પ્રોડ્યુસ કરેલી સીરિયલ ‘સાથ નિભાના સાથિયા 2’માં જાણીતા મોદી પરિવારની વાત છે. આ શોમાં ગત સીઝનના જાણીતા ચહેરા જેવા કે, ગોપી ( એક્ટ્રેસ દેવોલીના ભટ્ટાચાર્જી), કોકિલા (એક્ટ્રેસ રૂપલ પટેલ), અહેમ (એક્ટર મોહમ્મદ નાઝીમ) જોવા મળશે. આ ઉપરાંત નવા પાત્રો અને વાર્તા સાથે ટ્વિસ્ટ અને ટર્ન પર દર્શકોનું મનોરંજન કરશે.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.