22/10/2020

Bharat News Agency

The News Agency of India

ન્યૂઝીલેન્ડના વડાપ્રધાને રચ્યો ઈતિહાસઃ પહેલા કોરોનાને હરાવ્યો, હવે રેકોર્ડબ્રેક બહુમતીથી જીત્યા

1 min read

કોરોના વાયરસ વિરુદ્ધ દેશને વિજય અપાવનારા ન્યૂઝીલેન્ડના વડાપ્રધાન જેસિન્ડા અર્ડેર્ને ભારે બહુમતી સાથે ચૂંટણી જીતી લીધી છે

વેલિંગ્ટનઃ કોરોના વાયરસ વિરુદ્ધ દેશને વિજય અપાવનારા ન્યૂઝીલેન્ડના વડાપ્રધાન જેસિન્ડા અર્ડેર્ને ભારે બહુમતી સાથે ચૂંટણી જીતી લીધી છે. અગાઉ આ ચૂંટણી 19 સપ્ટેમ્બરે યોજાવાની હતી પરંતુ કોવિડ-19નો બીજો તબક્કો શરૂ થયો તેના કારણે ચૂંટણી સ્થગિત કરી દેવી પડી હતી. દેશના ઈતિહાસમાં આટલી મોટો વિજય કોઈ પાર્ટીને મળ્યો નથી. આ વિજય સાથે જ જેસિન્ડા વધુ એક વખત ન્યૂઝીલેન્ડની કમાન પોતાના હાથમાં સંભાળવા માટે તૈયાર છે.

50 વર્ષોમાં સૌથી વધારે સમર્થન

50-

જેસિન્ડા અર્ડેર્નની સેન્ટર-લેફ્ટ લેબર પાર્ટીને 87 ટકામાંથી 48.9 ટકા વોટ મળ્યા છે. જે અત્યાર સુધી કોઈ પક્ષને મળેલા સૌથી વધારે વોટ છે. વિજય બાદ જેસિન્ડાએ જણાવ્યું હતું કે દેશે લેબર પાર્ટીને 50 વર્ષમાં સૌથી વધારે સમર્થન આપ્યું છે. તેમણે કહ્યું હતું કે, દેશની સામે હાલમાં ઘણા પડકારો છે પરંતુ તેમનો પક્ષ દેશવાસીઓ માટે કામ કરશે. મુખ્ય વિપક્ષ નેશનલ પાર્ટીને ફક્ત 27 ટકા વોટ મળ્યા છે જે 2002 બાદ તેનું સૌથી ખરાબ પ્રદર્શન છે.

દુનિયાભરમાં થઈ હતી જેસિન્ડા અર્ડેર્નની પ્રશંસા

જેસિન્ડાએ કોરોના વાયરસ સામે જે રીતે લડત આપી હતી અને ન્યૂઝીલેન્ડમાં બે વખત કોરોનાને પરાજય આપ્યો તેને લઈને દુનિયાભરમાં તેમની પ્રશંસા થઈ હતી. આ ઉપરાંત પોતાના કાર્યકાળ દરમિયાન પણ તેઓ ઘણી વખત ચર્ચામાં રહ્યા હતા. તેમના કાર્યકાળમાં ન્યૂઝીલેન્ડમાં આતંકી હુમલાથી લઈને કુદરતી આપત્તિઓએ કહેર મચાવ્યો અને અંતમાં કોરોના વાયરસનો પણ સામનો કરવો પડ્યો. જોકે, આ તમામ પડકારોને જેસિન્ડાએ સફળતાપૂર્વક પાર પાડ્યા હતા જેના કારણે તેમની ઘણી પ્રશંસા થઈ હતી. ખાસ કરીને જ્યારે વિશ્વના શક્તિશાળી અને સમૃદ્ધ દેશોએ કોરોના સામે ઘૂંટણીયા ટેકવી દીધા હતા ત્યારે ન્યૂઝીલેન્ડને કોરોના મુક્ત કરવામાં તેઓ સફળ રહ્યા હતા.

એકતરફી બહુમતી પ્રથમ વખત મળી

મીડિયા અહેવાલ પ્રમાણે છેલ્લી સંસદીય ચૂંટણી 23 સપ્ટેમ્બર 2017ના રોજ થઈ હતી. ગત છ સપ્ટેમ્બરે સંસદને ભંગ કરી દેવામાં આવી હતી. જેથી કરીને ચૂંટણી માટે સત્તાવાર રીતે માર્ગ મોકળો થઈ શકે. 1996મા મિક્સ્ડ મેમ્બર પ્રોપર્શનલ રિપ્રેઝન્ટેટિવ (એમએમપી) તરીકે જાણીતી સંસદીય સિસ્ટમની શરૂઆતથી અત્યાર સુધી કોઈ પાર્ટીને ન્યૂઝીલેન્ડમાં એકતરફી બહુમતી મળી નથી. આ પ્રથમ વખત છે જ્યારે કોઈ એક પક્ષને આટલા મોટા પ્રમાણમાં બહુમતી મળી છે.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.