22/10/2020

Bharat News Agency

The News Agency of India

લદાખ સરહદે તણાવ ઓછો કરવા ચીને મૂકી આ શરત, ભારતે ફગાવી દીધી

1 min read

ભારત અને ચીન વચ્ચે હાલમાં લદાખ સરહદે તણાવ ચાલી રહ્યો છે. ચીન સતત ભારતને ઉશ્કેરી રહ્યું છે. જોકે, ભારતે પણ ચીનને જડબાતોડ જવાબ આપ્યો છે. જેના કારણે ચીન વધારે અકળાયું છે. બંને દેશો વચ્ચે ઘણા રાઉન્ડની મિલિટ્રી સ્તરની વાતચીત થઈ છે અને ડિપ્લોમેટિક સ્તરે પણ વાતચીત થઈ છે પરંતુ હજી સુધી આ વિવાદનો અંત આવ્યો નથી. એવામાં ચીને આ વિવાદનો શાંતિપૂર્વક ઉકેલ લાવવા માટે ભારત સામે એક શરત મૂકી છે જેને ભારતે ફગાવી દીધી છે.
ચીને ભારતને ફિંગર-4થી પાછળ હટવાનું કહ્યું

ચીને કહ્યું છે કે ભારત ફિંગર-4થી પાછળ હટે અને તેટલું જ તે પોતે પણ પાછળ હટશે. આનો મતલબ એ થયો કે ચીન ફિંગર-4થી ફિંગર આઠ પર જતું રહે (જે ભારતની માંગણી છે) પરંતુ ભારત પણ ફિંગર-1થી પાછળ જાય. જોકે, ભારત ફિંગર-8 સુધી પેટ્રોલિંગ કરી રહ્યું છે એટલે કે આ સ્થિતિમાં ભારત ફિંગર-1 અને ફિંગર-2 સુધી જ પેટ્રોલિંગ કરી શકે. ચીનો મતલબ સ્પષ્ટ છે કે ભારતને તેની જ સરહદમાં પાછળ ધકેલી દેવામાં આવે અને ચીન જે આપણા પેટ્રોલિંગ વિસ્તારમાં ઘૂસી આવ્યું છે તે પાછળ જાય. હાલમાં ભારતે ચીનની આ શરતને ફગાવી દીધી છે.

ભારતને સ્વીકાર્ય નથી ચીનની આ શરત

મીડિયા અહેવાલ પ્રમાણે ચીન ભારતને તેની સરહદમાં પાછા જવા માટે કહી રહ્યું છે. સૂત્રોએ જણાવ્યું છે કે ચીન તરફથી એક સૂચન કરવામાં આવ્યું હતું કે ભારત અને ચીન બંનેએ ફિંગર-4 વિસ્તારમાંથી સમાન રીતે પાછા જવું જોઈએ. જોકે, ભારતને ચીનનો આ પ્રસ્તાવ સ્વીકાર્ય નથી.

ચીનની સેના પેંગોંગ ત્સો લેક પાસે ફિંગર-5ની આસપાસ છે

હાલમાં ચીનની સેના પેંગોંગ ત્સો લેગની આસપાસ ફિંગર-5ની આસપાસ છે અને તેમણે ફિંગર 5થી 8 સુધી પાંચ કિલોમીટરથી વધારેના અંતરે મોટી સંખ્યામાં સૈનિકો અને હથિયારો તૈનાત કર્યા છે. ભારતીય પક્ષ હંમેશા ચીનને કહેતો આવ્યો છે કે ચીનની સેનાએ ફિંગર વિસ્તારથી પોતાના અગાઉના મૂળ સ્થાને જવું જોઈએ. સૂત્રોએ જણાવ્યું છે કે ચીની પક્ષના પ્રસ્તાવને સ્વીકારવો અશક્ય હતો.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.