22/10/2020

Bharat News Agency

The News Agency of India

અમેરિકન ચૂંટણીમાં ભારતીય વડાપ્રધાનનો પાવર, ટ્રમ્પે પ્રચાર વિડીયોમાં મોદીને કર્યા સામેલ

1 min read

વોશિંગ્ટનઃ અમેરિકાની રાષ્ટ્ર પ્રમુખ પદ માટેની આગામી ચૂંટણી માટે ડોનાલ્ડ ટ્રમ્પ અને જો બાઈડેન ભારતીય અમેરિકન મતદાતાઓને ખુશ કરવા અને પોતાની તરફ આકર્ષવા માટે મહેનત કરી રહ્યા છે. હવે અમેરિકન રાષ્ટ્ર પ્રમુખ ડોનાલ્ડ ટ્રમ્પે તે માટે ભારતીય વડાપ્રધાન નરેન્દ્ર મોદીની મદદ લીધી છે. હકીકતમાં ટ્રમ્પે પોતાના ચૂંટણી પ્રચાર અભિયાન માટે પોતાનો પ્રથમ વિડીયો જાહેર કર્યો છે. જેમાં વડાપ્રધાન મોદીના ભાષણો તથા ટ્રમ્પની અમદાવાદના ઐતિહાસિક સંબોધનની ટૂંકી ક્લિપ સામેલ છે. નવેમ્બરમાં યોજાનારી ચૂંટણી માટે અમેરિકામાં પ્રચાર અભિયાન ઝડપી બની ગયું છે.
ફેબ્રુઆરીમાં ટ્રમ્પ પરિવાર સાથે આવ્યા હતા અમદાવાદ

આ વર્ષે ફેબ્રુઆરીમાં અમેરિકન રાષ્ટ્ર પ્રમુખના ભારત પ્રવાસ દરમિયાન મોદી અને ટ્રમ્પે અમદાવાદમાં ભારે ભીડને સંબોધિત કરી હતી. ટ્રમ્પની સાથે તેમની પત્ની મેલાનિયા, પુત્રી ઈવાન્કા અને જમાઈ જેરેડ કુશનર અને તેમના વહિવટી તંત્રના ટોચના અધિકારીઓ પણ આવ્યા હતા. ટ્રમ્પની ફાઈનાન્સ કમિટીના રાષ્ટ્રીય અધ્યક્ષ કિમ્બર્લી ગુઈલફોયરે એક ટ્વિટમાં વીડિયો જાહેરખબર જાહેર કરતા કહ્યું છે કે, અમેરિકાનો ભારત સાથે ઘણો ગાઢ સંબંધ છે અને અમારા અભિયાનને ભારતીય-અમેરિકનોનું ઘણું મોટુ સમર્થન છે.

ફોર મોર યર્સ નામથી બનાવાયો છે વિડીયો

પ્રચાર અભિયાનનું નેતૃત્વ કરી રહેલા રાષ્ટ્ર પ્રમુખના પુત્ર ડોનાલ્ડ ટ્રમ્પ જૂનિયર ભારતીય-અમેરિકન સમુદાય સાથે ઘણી સારી રીતે જોડાયેલા છે. તેમણે પણ આને રીટ્વિટ કર્યો છે. આ વિડીયો સોશિયલ મીડિયા પર વાઈરલ થઈ રહ્યો છે. ફોર મોર યર્સ ટાઈટલ વાળો 107 સેકન્ડનો આ વિડીયો મોદી અને ટ્રમ્પના ફૂટેજ સાથે શરૂ થાય છે જેમાં બંને ગત વર્ષે વડાપ્રધાન મોદીના અમેરિકન પ્રવાસ દરમિયાન હ્યુસ્ટનના એનઆરજી સ્ટેડિયમમાં હાથમાં હાથ નાખીને ચાલતા જોવા મળે છે.

મોદીએ ભાષણમાં ટ્રમ્પની ઘણી પ્રશંસા કરી

તે સમયે વિશ્વની બે સૌથી મોટી લોકશાહી ધરાવતા દેશના નેતાઓએ 50,000થી વધારેની સંખ્યામાં આવેલા ભારતીય-અમેરિકનોને સંબોધિત કર્યા હતા. અમેરિકામાં પોતાના હજારો સમર્થકો વચ્ચે મોદીએ ભાષણ આપ્યું હતું જેમાં ટ્રમ્પની પ્રશંસા કરવામાં આવી હતી. ટ્રમ્પ વિક્ટરી ઈન્ડિયન અમેરિકન ફાઈનાન્સ કમિટીના સહ અધ્યક્ષ અલ મેસને વિડીયોની રૂપરેખા તૈયાર કરી છે. મોદી ભારતીય-અમેરિકનોમાં ઘણા લોકપ્રિય છે.

ભારતીય-અમેરિકનોમાં લોકપ્રિય છે વડાપ્રધાન મોદી

વડાપ્રધાન મોદીની અપીલે પ્રત્યેક વખતે મોટી ભીડને આકર્ષિત કરી છે. 2015મા મેડિસન સ્ક્વેર ગાર્ડનમાં અને બાદમાં બે વર્ષ પછી સિલિકોન વેલીમાં તેમનું સંબોધન ઐતિહાસિક રહ્યું હતું. જેમાં મોટી સંખ્યામાં લોકો હાજર રહ્યા હતા. મોદી અમેરિકામાં રહેતા ભારતીયોમાં ઘણા જ લોકપ્રિય છે. ગત વર્ષે સપ્ટેમ્બરમાં હ્યુસ્ટનમાં યાજાયેલા હાઉડી મોદી કાર્યક્રમમાં 50,000થી વધારે લોકોએ ભાગ લીધો હતો.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.