30/09/2020

Bharat News Agency

The News Agency of India

અમદાવાદના સેન્ટ્રલ મોલમાં કોરોના ગાઈડલાઈન્સનો ભંગ, તંત્રએ મોલ કર્યો સીલ

1 min read

સરકારે અનલોક કર્યું છે અને તેમાં મોલને પણ ખોલવાની છૂટ આપી છે. જોકે, માટે સરકારે કોરોના વાયરસને લગતા નિયમો અને ગાઈડલાઈન્સનું ચુસ્તપણે પાલન કરવાનું કહેવામાં આવ્યું છે. અમદાવાદમાં જ્યાં નિયમોનું ચુસ્ત પાલન કરવામાં આવી રહ્યું નથી તેની સામે તંત્ર આકરા પગલા લઈ રહ્યું છે. જેમાં હવે સોશિયલ ડિસ્ટન્સિંગના નિયમોના ભંગ બદલ એએમસી દ્વારા પંચવટી ખાતે આવેલા સેન્ટ્રલ મોલને સીલ કરી દેવામાં આવ્યો છે.
કોરોનાના નિયમોના ભંગ બદલ સેન્ટ્રલ મોલ સીલ

અમદાવાદના પંચવટી ખાતે આવેલા સેન્ટ્રલ મોલને સીલ કરી દેવામાં આવ્યો છે. મોલમાં સોશિયલ ડિસ્ટન્સિંગનું પાલન કરવામાં આવ્યું ન હતું. મોલમાં મોટી સંખ્યામાં લોકો ઉમટ્યા હતા અને ઘણા લોકો માસ્ક પહેર્યા વગર જ આવ્યા હતા. એટલું જ નહીં ગાઈડ લાઈન્સ પ્રમાણે મોલમાં ચેન્જિંગ કે ટ્રાયલ રૂમ ખોલવાની મંજૂરી નથી પરંતુ સેન્ટ્રલ મોલમાં ચેન્જિંગ અને ટ્રાયલ રૂમ પણ ખુલ્લા હતા. જેના કારણે મોલને સીલ કરી દેવામાં આવ્યો છે.

તહેવારોના કારણે ઉમટે છે ભીડ

નોંધનીય છે કે હાલમાં ઉત્સવોના દિવસો છે જેમાં શનિવાર અને રવિવારની રજા હોવાથી લોકો મોટી સંખ્યામાં ખરીદી માટે ઉમટી પડતા હોય છે. સેન્ટ્રલ મોલમાં પણ આવી જ ભીડ ઉમટી હતી જેના કારણે સોશિયલ ડિસ્ટન્સિંગના નિયમોનું પાલન થયું ન હતું. આ ઉપરાંત જાહેર સ્થળોએ માસ્ક પહેરવું ફરજીયાત હોવા છતાં મોલમાં ઘણા લોકો માસ્ક વગર ફરી રહ્યા હતા. આ બાબતો ધ્યાનમાં આવ્યા બાદ તંત્રએ મોલને સીલ કરી દીધો છે.

મોલ માટે જાહેર કરવામાં આવી છે ગાઈડલાઈન્સ

મોલને ખોલવા માટે પણ ગાઈડલાઈન્સ જાહેર કરવામાં આવી હતી. જેમાં મોલમાં પ્રવેશતી બે વ્યક્તિઓ વચ્ચે છ ફૂટનું અંતર ફરજિયાત છે. જ્યારે મર્યાદિત લોકોને જ એન્ટ્રી આપવામાં આવે. આ ઉપરાંત લિફ્ટના બટન અને એલિવેટરની રેલિંગ વારંવાર સેનિટાઈઝ કરવી. મોલની દુકાનોમાં અને શો-રૂમમાં ટ્રાયલ અને ચેન્જિંગ રૂમને ખોલવાની મંજૂરી આપવામાં આવી નથી.

વસ્ત્રાપુરના એ-વન મોલને સીલ કરાયો હતો

થોડા દિવસ પહેલા સોશિયલ ડિસ્ટન્સિંગનું પાલન ન થતા વસ્ત્રાપુરમાં આવેલા એ-વન મોલને પણ સીલ કરી દેવામાં આવ્યો હતો. હિમાલયા મોલમાં મેકડોનાલ્ડ્સ રેસ્ટોરન્ટ અને પ્રહલાદનગર કોર્પોરેટ રોડ પર આવેલા સિનર્જી બિલ્ડિંગમાં આવેલી સેવિયર ફાર્માસ્યુટિકલ કંપનીમાં તમામ સ્ટાફ માસ્ક વગર કામ કરતો હોવાથી ઓફિસને સીલ કરવામાં આવી હતી.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.