30/09/2020

Bharat News Agency

The News Agency of India

94 વર્ષના સ્વતંત્રતા સેનાની નંદલાલ શાહનું અમદાવાદ જિલ્લા પ્રશાસને ઘરે જઈ કર્યું સન્માન

1 min read

અમદાવાદના અખબારનગરમાં રહેતા સ્વતંત્રતા સેનાની નંદલાલ શાહ અંગ્રેજોથી ડર્યા નહોતા. તેઓ કહે છે કે મારા જીવનનો એક જ મંત્ર છે ‘કોઇ જ નકારાત્મક વિચાર નહીં, ક્યારેય પણ નહીં.’ 74માં સ્વતંત્રદિન નિમિત્તે અમદાવાદ જિલ્લા પ્રશાસને નંદલાલ શાહનું તેમના ઘરે જઈ સન્માન કર્યું હતું. દર વર્ષે સ્વાતંત્રપર્વ નિમિત્તે સ્વતંત્રતા સેનાનીઓનું રાજભવન ખાતે આમંત્રિત કરી સન્માન કરવામાં આવતું હોય છે. પરંતુ આ વર્ષે કોરોના સંક્રમણની પરિસ્થિતિને કારણે જિલ્લા પ્રશાસન દ્વારા સ્વતંત્રતા સેનાનીઓનું તેમના ઘરે જઈ સન્માન કરવાનો નિર્ણય લેવામાં આવ્યો છે.

નાયબ કલેકટર જે. બી. દેસાઈએ જણાવ્યું કે, જિલ્લા પ્રશાસન અને રાજ્ય સરકાર તરફથી આજે નંદલાલ શાહનું સન્માન કરતા હું ગર્વની લાગણી અનુભવું છું. માત્ર 17 વર્ષની ઉંમરે પોતાનું સર્વસ્વ દાવ પર લગાવી અંગ્રેજો સામે સંઘર્ષ કરનારા નંદલાલ શાહના આપણે ઋણી છીએ.

વર્ષ 1926માં જન્મેલા નંદલાલ શાહે માત્ર 17 વર્ષની ઉંમરે સ્વતંત્રતા લડતમાં ઝંપલાવ્યું અને મિત્રો સાથે મળીને તેઓ સુરેન્દ્રનગરમાં ભાંગફોડિયા પ્રવૃત્તિમાં લાગી ગયેલા. 1942ની ઓગસ્ટ ક્રાંતિના રણશિંગા ફૂંકાયા ત્યારે નંદલાલ શાહ અમદાવાદના સી. એન. વિદ્યાલયમાં મેટ્રિકમાં અભ્યાસ કરતા હતા. સત્યાગ્રહ, હડતાળ, સરઘસ, સભાઓ, લાઠીચાર્જ અને ધરપકડના બનાવો યુવાન નંદલાલ શાહને બેચેન કરતા હતા. યુવા નંદલાલે બંગાળની લશ્કરી ફેક્ટરીમાંથી ચોરાઇને આવેલો દારૂગોળો મેળવ્યો. નંદલાલ શાહે તેમના મિત્ર ભોગીલાલ અને કાનજી સાથે મળી બોમ્બ બનાવ્યો.

10 જાન્યુઆરી 1943ના દિવસે સુરેન્દ્રનગરની જેલ ઉપર બોમ્બ ફેંક્યો. એન. ટી. એમ. હાઇસ્કુલ સામેના મેદાનમાં એંગ્લો ઇન્ડિયન સર્કસ પર પણ બોમ્બે ફેંકી ભાગી છુટ્યા. 5 ફેબ્રુઆરી 1943ના દિવસે ભોગાવા નદીના પુલ ઉપરથી પસાર થતી ગુડ્ઝ ટ્રેનને ઉથલાવવા રેલવે પુલ ઉપર બોમ્બ ફેંક્યો. આખરે પોલીસ કાર્યવાહીમાં ધરપકડ થઇ ગઈ. પ્રખ્યાત બનેલા ભોગાવો કેસમાં નંદલાલ પર રેલવે એક્ટ, ડિફેન્સ ઓફ ઈન્ડિયા એક્ટ, એક્સપ્લોઝિવ સબસ્ટન્સિઝ એક્ટ ઉપરાંત સી.આર.પી.સી હેઠળ ખટલો ચલાવવામાં આવ્યો.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.