30/09/2020

Bharat News Agency

The News Agency of India

રિયા ચક્રવર્તીએ રજૂ કર્યો સુશાંતે લખેલો લેટર, દાવો કરતાં કહ્યું- ‘મારી પાસે માત્ર આટલું જ છે’

1 min read

સુશાંત સિંહ રાજપૂતના પિતા કે. કે. સિંહે રિયા ચક્રવર્તી સામે પોતાના દીકરાને આત્મહત્યા માટે ઉશ્કેરવા સહિતના આરોપ લગાવ્યા છે. શુક્રવારે EDએ રિયા ચક્રવર્તીની 8થી વધુ કલાકો સુધી પૂછપરછ કરી હતી. હવે રિયાના વકીલ સતીશ માનેશિંદેએ સુશાંતે ‘કૃતજ્ઞતા’ વ્યક્ત કરતાં લખેલી એક નોટ શેર કરી છે. રિયાની નોટબુકમાં સુશાંતે કેટલાક વાક્યો લખ્યા છે જેમાં તેણે તેના જીવનમાં રિયા અને તેના પરિવારની હાજરી બદલ કૃતજ્ઞતા વ્યક્ત કરી છે.

સુશાંતે નોટમાં 9 વાક્યો લખ્યા છે. જે આ મુજબ છે: ‘હું મારા જીવન માટે કૃતજ્ઞ છું. લીલૂ મારી જિંદગીમાં છે એટલે આભારી છું. બેબુ મારા જીવનમાં એટલે કૃતજ્ઞ છું. મારા જીવનમાં સર અને મેડમની હાજરી બદલ કૃતજ્ઞ છું. ફજ મારા જીવનમાં છે એટલે કૃતજ્ઞ છું. મારા જીવનમાં જેટલો પણ પ્રેમ છે તે બધા માટે આભારી છું.’

સુશાંતે લખેલી નોટમાંના નામો અંગે સ્પષ્ટતા કરતાં રિયાએ કહ્યું, “તેણે લખેલા અક્ષરોમાં લીલૂ શોવિક છે, બેબુ હું છું, સર મારા પિતા છે, મેડમ મારી મમ્મી છે, ફજ તેનો ડોગ છે.” આ સાથે જ ‘છીછોરે’ લખેલી સુશાંતની બોટલની તસવીર પણ શેર કરી છે. આ બે તસવીરો શેર કરીને રિયા ચક્રવર્તીએ દાવો કર્યો છે કે, તેની પાસે સુશાંતની આ બે જ વસ્તુઓ છે. મહત્વનું છે કે, રિયા દ્વારા શેર કરવામાં આવેલી આ ‘ગ્રેટિટ્યુડ નોટ’માં કોઈ તારીખનો ઉલ્લેખ નથી. મતલબ કે, સુશાંતે આ નોટ ક્યારે લખી હતી તેની કોઈ ચોક્કસ માહિતી નથી.

મહત્વનું છે કે, રિયાની સાથે શ્રુતિ મોદી અને શોવિક ચક્રવર્તીની પણ ઈડીએ શુક્રવારે પૂછપરછ કરી હતી. અગાઉ એક્ટ્રેસે સુપ્રીમ કોર્ટનો ચુકાદો આવી જાય ત્યાં સુધીની મુદત આપવાની ઈડીને વિનંતી કરી હતી. જો કે, ઈડીએ આ વિનંતી નામંજૂર કરતાં એક્ટ્રેસ ઈડીની ઓફિસે હાજર થઈ હતી. રિયાએ તેના સામે થયેલો કેસ મુંબઈ ટ્રાન્સફર કરવાની માગ સુપ્રીમ કોર્ટમાં કરી છે. સુપ્રીમ કોર્ટમાં 11 ઓગસ્ટે આ અરજી પર સુનાવણી થવાની છે.

Leave a Reply

Your email address will not be published. Required fields are marked *

Copyright © All rights reserved to Bharat News Agency | Newsphere by AF themes.